#SELAMAT PAGI DONGAN SASUDENA#
(Marsiajar Pature Pantun Angkola)_____________________________________________
Saba dongan da parngoluan
bulu amangda pangitean
pantun dongan hangoluan
tois amangda hamatean
Sai partunggul di padosdos
di ikat toko-toko aso damos
hapadean nihalak akon dibalos
bisa balos kasih sangape ulos
Keta mulak baya tu huta
huta hatubuan haroroanta
muda mardongan baya hita
ulang sai au dipahata hata
Dongan tu bulan mardalan-dalan
iba tu saba sai mangarimbasi
dongan dijolo ma patudu dalan
halak na parpudi aso mangihuti
Tubu tolong di lobu-lobu
lobu jelok di Bagas Nagodang
muda mardongan martogu-togu
di nagolap bope natorang
Bulan pardomuan nisi malolong
bintang narumiris siliginon
ulang dongan sai mardua holong
holong na ikhlasdo silehenon
Muda tu aekmilas dongan-dongan
pilima dongan aek milas sosopan
muda milas di rasa mardongan
nasehati ma dongan aso marsopan
Balakka da dongan sapot-sapot
madabu tarutung tu na pot-pot
bisa do dongan na dapot-dapot
bisa muse dongan koum sisolkot
Tonga borngin marende-ende
ende najolo taringot-ingot
muda mardongan tu napade
sampe matepe lek di ingot
Batu Horpak tu Pining nabaris
mardalan lewat Bunga Bondar
ulang dongan dibaen tangis
apalagi dipamasuk tu bondar-bondar
Lalat naposo sai dasalongan
pisang namalamun dipargantungan
halak naposo bisa di padongan
halak natobang bisa pargantungan
Pramuka da dongan markupia
markupia da songon raja
jalahi dongan berhati mulia
aso tanda iba anak ni raja
Pittu togos di baen palang
palang dibaen sian maratti
molo nung dongan jadi ualang
lehen ma dongan cinta sejati
Ulang dongan marrait-rait
muda kehe marlayang-layang
ulang dongan mar gait-gait
tu nattulang marsayang-sayang
Dokar dongan do sitokarna
Kardo sitokar do donganna
Dosa dongan na do sasudena
Sado sasudena do donganna
____________________________________________
Kakakakakaka...kkk.... na hebat ma group on. Biasana ipadao do, dosa.
On jadi, dipadonok muse noma. Alagleh...! Baginabiama. Enter...!
Selamat pagi dongan sasudena. Selamat beraktivitas dongan sitokar.(rfs)
______________________________________________
Cat :
*Samapi 1 Januari 2013 dilihat 53 kali
mantap bah....
ReplyDeleteTrims bah Ipar bah.
ReplyDelete